ରାଜଧାନୀରେ ଜଗନ୍ନାଥ

ଭୟାତୁର ଜଗନ୍ନାଥ ଝାଳନାଳ

ଓ ଧଇଁସଇଁ ହେ‍ାଇ;
ଅତର୍କିତ ପହଁଚିଲେ ଲିଙ୍ଗରାଜଙ୍କ
        ରାଜଧାନୀସ୍ଥିତ ପୁରୁଣା ଘରେ ଯାଇ!
ଲିଙ୍ଗରାଜ କହିଲେ ଆସିଲା ପୂର୍ବରୁ
ଟିକେ ଫୋନ୍ କରିଥାନ୍ତେ ସିନା;
ଜଗନ୍ନାଥ କହିଲେ କେମିତି କରିବି
          ମୋତେ ପରା ଟେଲିଫୋନ ମନା!!

ଜଗନ୍ନାଥଙ୍କୁ ଘରେ ପାଇ ଲିଙ୍ଗରାଜେ
ଆଶ୍ଚର୍ଯ୍ୟ ଓ ଆନନ୍ଦିତ ହେଲେ;
ଏଇ ଖୁସିରେ ଚାକର ନନ୍ଦି ହାତରେ
ବଜାରରୁ ଛେନା ଓ ଗଞ୍ଜେଇ ମଗେଇଲେ!
କହିଲେ ଆପଣଙ୍କ ଘର ଭଳିଆ
ଆମର ତ ଭଲ ରୋଷେଇ ନୁହଁ;
ତଥାପି ଏତେ ଦିନକେ ଆସିଛ ମାନେ
                 କଣ ସ୍ବତନ୍ତ୍ର ଖାଇବ କୁହ?

ଜଗନ୍ନାଥ କହିଲେ ହେ ଲିଙ୍ଗ ଭାଇ
ଏବେ ସେ ସବୁ କିଛି ଦରକାର ନାଇଁ;
ମୁଁ ବଡ ଅସୁବିଧାରେ ପଡି
          ଆସିଛି ଆପଣଙ୍କ ସାହାଯ୍ୟ ପାଇଁ!
ଆପଣ ତ ମହାରାଗି ହଣାମରା
କାମପାଇଁ ଆଗରୁ ନାଆଁ ଅଛି;
ଏଇକ୍ଷଣି ଚାଲନ୍ତୁ ମୋ ସାଥୀରେ
       ସୈତାନ ଗୁଡାକୁ ହାଣନ୍ତୁ ବାଛିବାଛି!

ଲିଙ୍ଗରାଜ କହିଲେ ଜଗନ୍ନାଥ ଭାଇ
ଆଉ କଣ ସେଇଯୁଗ ଅଛି;
ଆଇନି ଏବେ ଭାରି କଡା ତେଣୁ ମୁଁ
          ହତିଆର ଥୋଇ ଘରେ ବସିଛି!
ହେଲେ କିଏ ସେ ଆପଣଙ୍କୁ
ଏମିତି ହଇରାଣ କରୁଛି;
ଆପଣଙ୍କ ପୁରୁଣା ଶତ୍ରୁ କଳାପାହାଡର
               କଣ କିଏ ବଂଶଧର ଅଛି?

ଜଗନ୍ନାଥ କହିଲେ କହନି କହନି
ମୋ ଘର ଲୋକ ସବୁ;
ନଚଉଛନ୍ତି ମୋତେ ଧନରତ୍ନ
ରୋଷେଇବାସ ଓ ସମୟ କରି କାବୁ!
ମୋତେ ଦେଖାକରି ଆସିଥିବା
ଲୋକଙ୍କୁ ଦୁର୍ବ୍ୟବହାର କରି;
ଶୃଙ୍ଖଳିତ ହେବାକୁ କହିଲେ
ଦଳବଦ୍ଧ ହୋଇ କରନ୍ତି ତେରିମେରି!!

ଲିଙ୍ଗରାଜ କହିଲେ ଭାଇ ସବୁଆଡେ
ଏ ସମସ୍ୟା ଯାଉଛି ବଢି;
ମୋ ପାଖକୁ ଏ ଅଭିଯୋଗ ନେଇ
ନିତି ଆସନ୍ତି କେତେ ବୁଢା ଓ ବୁଢୀ!
ଶୁଣିଥିଲି ତମକୁ ମଝିରେ ଦିନଦିନ
ଉପାସରେ ରଖିଥିଲେ ଖାଇବା ନଦେଇ;
ହେଲେ ଏସବୁ ସାଧାରଣ କଥା
         ଘରକଥା ଘରେ ଦିଅନ୍ତୁ ଚଳେଇ!

ଜଗନ୍ନାଥ କହିଲେ ଏଠି ଆପଣଙ୍କର
କ୍ଷମତାଶାଳୀ ସବୁ ସାଇଭାଇ;
କୁହନ୍ତୁ ସେ ବଦମାସ ଗୁଡାକୁ
ଢୁକେଇ ଦିଅନ୍ତୁ ଜେଲ୍ ହାଜତରେ ନେଇ!
ଲିଙ୍ଗରାଜ କହିଲେ ତମପରି
ମୁଁ ବି ନାଚାର ହେ ଭାଇ;
ସେ ସବୁ କରିବା ପାଇଁ
            ଆମ ହାତରେ ଭୋଟ କାଇଁ?

@ଡ.କୁଳାଙ୍ଗାର
www.drkulangar.com